ភ្នំពេញ៖ តំណាងយុវជននៃគណបក្សប្រជាជនកម្ពុជា ប្ដេជ្ញាពង្រឹងមិត្តភាពល្អរវាងគណបក្សប្រជាជន និងបក្សកុម្មុយនីស្តចិន សំដៅរក្សាដៃគូជាយុទ្ធសាស្ត្រគ្រប់ជ្រុងជ្រោយដើម្បីផលប្រយោជន៍នៃប្រទេសទាំងពីរ។

ក្នុងសេចក្ដីប្រកាសព័ត៌មានពីលទ្ធផលនៃការចូលរួមកិច្ចប្រជុំកាលពីថ្ងៃទី៩ កញ្ញា រវាងយុវជនបក្សប្រជាជនកម្ពុជាដែលតំណាងដោយលោក គឹម រិទ្ធី ជាមួយគណបក្សកុម្មុយនីស្តចិន ឱ្យដឹងថា តំណាងយុវជនបក្សទទួលស្គាល់ថា ទំនាក់ទំនងមិត្តភាពរវាងកម្ពុជានិងចិន បានធ្វើឱ្យកម្ពុជាទទួលប្រយុទ្ធប្រឆាំងនឹងជំងឺកូវីដ-១៩ បានយ៉ាងល្អនៅតំបន់ លើសពីនេះក្នុង នាមជាតំណាងយុវជនបក្សលោកប្ដេជ្ញាចិត្តសម្រាប់បង្កើនទំនាក់ទំនងជាមួយបក្សកុម្មុយនីស្តចិន ដើម្បីបន្តភាពជាអ្នកដឹកនាំក្នុងតំបន់ដើម្បីភាពរីកចំរើនទាំងអស់គ្នាផងដែរ។

ក្នុងសេចក្តីប្រកាសនោះសរសេរថា៖ « កម្ពុជានិងចិន បានសហការពង្រឹងវឌ្ឍនភាព នៃកិច្ចសហប្រតិបត្តិការដៃគូរយុទ្ធសាស្ត្រគ្រប់ជ្រុងជ្រោយ សម្រាប់ផលប្រយោជន៍នៃប្រជាជនទាំងពីរប្រទេស ហើយតំណាងឱ្យយុវជនថ្នាក់កណ្ដាលគណបក្សប្រជាជនកម្ពុជា សូមប្ដេជ្ញាចិត្តបន្ត និងពង្រឹងមិត្តភាពដ៏ល្អរវាងគណបក្សប្រជាជនកម្ពុជា និងគណបក្សកុម្មុយនីស្តចិន » ។

គួរបញ្ជាក់ថា កិច្ចពិភាក្សានេះគឺធ្វើឡើងដោយគណបក្សកុម្មុយនីស្តចិន ជាមួយនឹងគណបក្សផ្សេងៗទៀតក្នុងតំបន់អាស៊ីអាគ្នេយ៍ និងអាស៊ីខាងត្បូង ដើម្បីពង្រឹងកិច្ចសហប្រតិបត្តិការគណបក្សនយោបាយក្នុងការរួមគ្នាអភិវឌ្ឍសេដ្ឋកិច្ច៕